برگزیده اشعار زیبای هزارگی

از شاعر جوان و با استعداد ناصر نادر :

چیمایت پور خوماره بندی دیل مه 
وفایت   بی شوماره  بندی دیل مه
مه ره پیچیق کنو  شیفتی بغل خو
که  دونیا  بیتوباره  بندی دیل مه
**********************
اجب  بیه بیلند  و خوش   صیفاتی
اَلی  مزگی  تر  از  قند  و    نباتی
ده نوربندی تو شک ندروم ازیزوم
مگم   قیرو   کمک   بی   ایتیاتی
***********************
بوگی  شیری   نیشانی  از  محل   خو
بیسه  سَم  کو  ده گوش دیل غزل خو
سونی قَیشَخ شودی جاغه مه توغ کو
بیدی  ماخ  از  لبای  پور   اَسل  خو
************************
تو  نوربندگ   اجب  جادوگیری  نی
ده خاویم تا گول صوب شبکیری نی
مه ره  ایلمگ  کیده خود تو توتا نی
موی  تریگ  مه ره خاگیشتیری نی
**********************
تنا   شیشتی  دیل   پیتو   گولی گول
بلی  شانه  مویا  پورتو   گولی گول
ده مه ثابیت شود از قاشیت که عیده
نی یه  آجد  ده  مایی نو  گولی گول
 ***********************
ده  قاشا  مایی نو باشی گولی گول
مه یوم  دان  تگو باشی گولی گول
بوگی  تورای  دیل  خو  یکه  یکه
سر سینه مه  خو باشی گولی گول
************************
گول سورخ  بها ر استی گول ای گول
پنای کیشت و کار استی گول ای گول
مره  که  توغ  مونی  از شینگ چادر
امیشه  خنده دار  استی گول ای گول
************************
گاج  رنگه  به لی  کاکول  تو  باشوم
رفیقی   خنده ی   مقبول   تو  باشوم
بیخانوم  شیعر  ایشقی  از  تای   دیل
تو گول باشی و مه بولبول تو باشوم
****************************
بوی   پیچه   تو  ده  سومبول   نه باشه
از   تو   واری   کسی   مقبول  نه باشه
الی   از   تای    دیل   دایم   می  خانوم
خودیت گول باشی اومریت گول نه باشه
************************
تو واری گول گولی  مقبول نه باشه
پیرو  لَو لَو  چپه   کاکول  نه باشه
الی   دایم    امی    باشه    دووایم
چیراغ  توخینه  تو  گول  نه باشه
***********************
الا    ای     مایی    تابوی    ازاره
چیمایت    قاصیدی   فصل   بهاره
بیشی بیخیم صوبا سفر ره یی یوم
کنوم  قد    تار موی تو ایستیخاره
************************
بی  غیر  از تو نی  یوم  تکمیل  کوجایی
گیریفتاروم   ده   درد   سیل     کوجایی
موفامی  کوی  مونوم  شَو تا گول صوب
کوجایی   یار   نازوک   دیل    کوجایی
**************************
ساده نوربند و بی موشکیل مه باشی
گولی  اومید   کولی  آصیل مه باشی
جگه   پایت   به لی  اوقره مه باشه
امیشه   نازنین   دیل    مه    باشی
*************************
اجب   پيچه  کشالی   دوختر قوم
بيه    ميثل   نيالی    دوختر قوم
بيه   ميثل   نيالی  تازه  و  راس
ده  خوبی  بی ميثالی دوختر قوم
**************************
غد ر سودا  ده  سر  موری گولی مه
زی  آليم  بی  خبر  موری   گولی  مه
مه ره توغ کو که بی تو دم مه بوره
چيکه  بازم  سفر  موری   گولی مه
**********************
ازيز   و  نرم  خويی   مايی تابو
اميشه   خنده  رويی   مايی تابو
ده  بين  دوخترون  شار  کابول
اجب  مرغوله   مويی مايی تابو
**********************
ديراز   اوفتاده    روی   بيستر   استوم
مريض   تفت  ديل  ـ  درد  سر   استوم
دم    موردو    اگه   رويت   نه  بينوم
قسم    موخروم     شيّد  اکبر   استوم
**********************
لاته   خو   تر  کو بيل شيفت قچر  مه
تَو يم    ره   کم   کَنو  او  موتبر  مه
اوقس    گيمرِی  کنوم  از مغز ديل خو
که  شور  نخری  ديگه از تای سر مه
************************
اليگو   کشکی  چوغلی  در  بيگيره
آشيقی  مه  و  ديلبر   سر   بيگيره
نيلغه واری کنوم قد موی شی بازی
اگه  ده  تخت  ديل  بيستر  بيگيره
***********************
غدر   غيتا   گيرو  پيتيوه  گشتوم
امو  مولکای  بی  کوتيوه  گشتوم
تو  واری  آدمی  نوربند نه ديدوم
تمام   نوبيله   نوشيوه    گشتوم
***********************
کوجايی   يار  کم  پيدای   آشيق
مزه دار از تو شود دونيای آشيق
بليبور  ده  بانه  توغ   کيده   تو
سر و جان و  ديل  شيدای آشيق
ناصر نادر
منبع : وبلاگ  منجی http://manjee.blogfa.com /